Azərbaycanın Milli Qəhrəmanı Natiq Qasımovun ad günü münasibətilə xatirə abidəsi açıldı
Mingəçevir şəhərində Azərbaycanın Milli Qəhrəmanı, şəhid Natiq Qasımovun ad günü münasibətilə onun xatirəsinə ucaldılmış abidənin açılış mərasimi keçirilib. Tədbir Azərbaycan Vətən Müharibəsi Veteranları İctimai Birliyinin (AVMVİB) Mingəçevir şəhər şöbəsinin təşkilatçılığı ilə baş tutub.
Açılış mərasimində AVMVİB-nin üzvləri, şəhidin ailə üzvləri, dostları, eləcə də şəhər ictimaiyyəti iştirak edib. Tədbir iştirakçıları şəhidin ruhunu ehtiramla yad edib, onun həyat və döyüş yolu haqqında çıxışlar ediblər.
Mərasim çərçivəsində şəhidin ruhuna dualar oxunub, qəhrəmanlıq dolu xatirələri dərin hörmətlə xatırlanıb. Tədbir iştirakçıları Natiq Qasımovun vətən qarşısında göstərdiyi qəhrəmanlıqların gənc nəsil üçün örnək olduğunu vurğulayıblar.
Milli Qəhrəmanın xatirəsini əbədiləşdirmək məqsədilə ucaldılmış abidə, onun Vətən qarşısındakı xidmətlərini yaddaşlarda daim yaşadacaq bir simvol olaraq dəyərləndirilib.
Qeyd edək ki, Birinci Qarabağ müharibəsində itkin düşmüş Natiq Qasımov beş gün ac-susuz qalsa da, bayrağımızı əlindən düşürməyib.
N.Qasımov 1971-ci ildə Azərbaycan Respublikası, Gədəbəy rayonu, Kiçik Qaramurad kəndində anadan olub. Ermənistan silahlı birləşmələrinin Azərbaycan Respublikasının suveren ərazilərinə hücumu ilə bağlı 1991-ci ildə könüllü olaraq Ağdam rayonunda təşkil edilmiş “Qaradağ şahinləri” taboruna yazılaraq, Vətənin müdafiəsində iştirak edib. 12 mart 1992-ci ildə Xocalı rayonu, Pirlər (Xramort) kəndi istiqamətində gedən döyüşdə Ermənistan hərbçiləri tərəfindən əsir götürüb.
Natiq Qasımov Xocalı rayonu, Pirlər kəndi yaxınlığında yüksəklikdə yerləşən Alban kilsəsi uğrunda döyüş zamanı altı döyüş yoldaşı həlak olduqdan sonra beş gün ac-susuz orada qalaraq təkbaşına döyüşüb. Gülləsi qurtardığından altıncı gün, 12 mart 1992-ci ildə rusiyalı və italiyalı jurnalistlər — Konstantin Smirnov və Enriko Sarzinin şahidliyi ilə Ermənistan hərbçiləri tərəfindən əsir götürülüb. Onun əsir götürlməsi faktı Rusiyada nəşr edilən “Oqonyok” jurnalının 1992-ci il 14 və 15-ci nömrələrində “Strax” adlı məqalədə təsvir edilib.
25 iyun 2024-cü ildə Azərbaycan Prezidenti, Ali Baş Komandan İlham Əliyevin sərəncamı ilə Natiq Qasımova Milli Qəhrəman adı verilib.
Nurlan Məmmədli
AVMVİB-in Mətbuat xidməti
