Təbrik: Eldar Rüstəmov — 63

Bu gün Azərbaycan Vətən Müharibəsi Veteranları İctimai Birliyinin (AVMVİB) silahdaşlarından biri olan — təşkilatın Suraxanı rayon şöbəsinin sədri Eldar Rüstəmovun doğum günüdür. Avqust ayının 22-də onun 63 yaşı tamam olur.

Eldar Rüstəmov 1963-cü il avqustun 22-də Naxçıvan Muxtar Respublikasının Kəngərli rayonunun Qıvraq kəndində dünyaya göz açıb.

O, 1980-ci ildə Qıvraq kənd orta məktəbini, 1991-ci ildə isə Memarlıq və İnşaat İnstitutunu bitirib. Əmək fəaliyyətinin ilk illərində Suraxanı Rayon İcra Hakimiyyətinin memarlıq və humanitar sahələr üzrə müvafiq strukturlarında müxtəlif vəzifələrdə çalışıb.

Lakin Eldar Rüstəmovun həyat yolunda Vətənin müdafiəsi xüsusi yer tutur. Azərbaycanın ən ağır sınaqlarla üzləşdiyi Birinci Qarabağ müharibəsi illərində o da Vətənin çağırışına biganə qalmayıb. 1992–1993-cü illərdə Azərbaycan Ordusunun tərkibində Ağdam, Ağdərə və Şuşa istiqamətlərində gedən döyüşlərdə iştirak edib, ona həvalə olunan döyüş tapşırıqlarını layiqincə yerinə yetirib. Şuşanın müdafiəsi uğrunda gedən ağır döyüşlər zamanı yaralanması da onun keçdiyi döyüş yolunun unudulmaz səhifələrindən biridir.

Müharibə başa çatsa da, Eldar Rüstəmov üçün Vətənə xidmət bitməyib. O, sonrakı illərdə də veteranların yanında olub, onların qayğı və problemlərinə həssaslıqla yanaşıb, müharibə iştirakçılarının cəmiyyətdə layiq olduqları ehtiramın qorunmasına öz töhfəsini verməyə çalışıb.

1996-cı ildən Azərbaycan Vətən Müharibəsi Veteranları İctimai Birliyinin Suraxanı rayon şöbəsinin sədri kimi fəaliyyət göstərən Eldar Rüstəmov uzun illər ərzində veteran hərəkatının fəal üzvlərindən biri olub. Onun fəaliyyətində silahdaşlarına sədaqət, veteranların problemlərinə diqqət, şəhid ailələrinə ehtiram və gənc nəslin vətənpərvərlik ruhunda yetişdirilməsi kimi dəyərlər mühüm yer tutur.

Eldar Rüstəmovun ən qiymətli xüsusiyyətlərindən biri də illər keçdikcə döyüş yoldaşlarına və Vətən qarşısındakı mənəvi borcuna münasibətinin dəyişməməsidir. Həyatının müxtəlif mərhələlərində qazandığı təcrübə, insanlarla münasibətdə səmimiyyəti, məsuliyyət hissi və ictimai fəaliyyətə bağlılığı onu silahdaşları arasında hörmət qazanan veteranlardan birinə çevirib.

44 günlük Vətən müharibəsi günlərində də o, hərbi qulluqçularımızın yanında olmağa çalışıb, imkanları daxilində onlara dəstəyini əsirgəməyib. Azərbaycan Ordusunun tarixi Zəfəri hər bir Birinci Qarabağ müharibəsi veteranı kimi onun üçün də illərlə gözlənilən ən böyük mənəvi qürur və sevinc mənbəyinə çevrilib.

Bu gün 63 yaşını qeyd edən Eldar Rüstəmovun keçdiyi ömür yolunda Vətənə xidmət, döyüşçü şərəfi və ictimai fəaliyyət bir-birini tamamlayır. Belə insanların həyat yolu həm də gənc nəslə Vətən sevgisinin yalnız sözlə deyil, əməl və xidmətlə ifadə olunduğunu göstərir.

Azərbaycan Vətən Müharibəsi Veteranları İctimai Birliyinin rəhbərliyi, səbəbkarın doğmaları, dostları, iş və döyüş yoldaşları Eldar Rüstəmovu ad günü münasibətilə səmimi-qəlbdən təbrik edir, ona möhkəm cansağlığı, uzun və mənalı ömür, ailə səadəti, ictimai fəaliyyətində uğurlar arzulayırlar.

63 yaşınız mübarək, Eldar müəllim!

AVMVİB-in Mətbuat xidməti