Amerikalı videobloger azad olunmuş ərazilərdə
Amerikalı videobloger Doug Barnard Azərbaycanın işğaldan azad olunmuş ərazilərinə səyahəti ilə bağlı yeni video paylaşıb.
Axar.az xəbər verir ki, “Show Me Azerbaijan” layihəsi çərçivəsində may ayının sonunda Azərbaycana səfər etmiş səyyah Ağdam, Füzuli və Cəbrayılda gördükləri ilə bağlı təəssüratlarını öz yutub kanalında yayımlayıb.
Öncə Gəncə şəhərində Ermənistan tərəfindən ballistik raket hücumları nəticəsində dağıntılara məruz qalmış evlərin çəkilişini edən videobloger bu hücumlar nəticəsində 32 dinc vətəndaşın həyatını itirdiyini, 120-dən çox sakinin yaralandığını bildirib. Daha sonra işğaldan azad edilmiş Ağdam şəhərinə yola düşən videobloger erməni işğalının ağır və dağıdıcı nəticələrini lentə alaraq gördükləri haqda məlumat verib.
Səfərdə iştirak edən məcburi köçkün Fəxrəddin Hacıyevin 28 il sonra ilk dəfə öz doğma şəhərinə qayıdışı və yerlə-yeksan edilmiş evini tapması videoda izləyicilərə təqdim olunub. Videobloqda İslam Əməkdaşlıq Təşkilatı (İƏT) Gənclər Forumunun Avrasiya üzrə Regional Mərkəzinin direktoru Elməddin Mehdiyev işğaldan öncə Ağdam şəhərində yaşayan otuz min sakinin erməni işğalçıları tərəfindən didərgin salındığını və şəhərin işğaldan sonrakı dövrdə misilsiz dağıntılara məruz qaldığı üçün “ruhlar şəhəri” adlandırıldığını qeyd edib. Ağdam Cümə Məscidinə gələn videobloger onun tarixi haqda qısa məlumat verərək, işğal dövründə tövlə kimi istifadə edildiyini təəssüflə bildirib. Bloger ərazilərin işğal zamanı minalandığını və hazırda minalı geniş ərazilərin insanlar üçün böyük həyati təhlükə yaratdığını qeyd edib.
İranla həmsərhəd ərazilərə, o cümlədən Xudafərin körpüsünə gedən videobloger körpünün tarixi haqda öz izləyicilərinə məlumat verib.
Xatırladaq ki, “Show Me Azerbaijan” layihəsi İƏT Gənclər Forumunun Bakıda yerləşən Avrasiya üzrə Regional Mərkəzinin təşkilatçılığı ilə həyata keçirilib və layihədə 8 ölkədən 13 sosial media fenomeni iştirak edib. Layihənin təşkil edilməsində əsas məqsədlərdən biri azad edilmiş ərazilərimizdə mövcud olan vəziyyət, işğalın ağır nəticələri, Ermənistan tərəfindən törədilmiş kütləvi dağıntılar və vandallıqlar ilə beynəlxalq ictimaiyyəti yaxından tanış etmək olub.
