“İlham Əliyev Azərbaycanın məsuliyyətli, sivil obrazını yaratdı”- Rusiyalı ekspert

“Prezident İlham Əliyevin mətbuat konfransı təkcə media ilə söhbət etmək istəyindən doğmadı. Bu, dəqiq plan üzərində qurulmuş məlumat əməliyyatı oldu”.

“Report” xəbər verir ki, bunu Rusiyanın “Kommersant” Nəşriyyat Evinin xarici siyasət şöbəsinin müdiri, ekspert Aleksey Naumov Prezident İlham Əliyevin yerli və xarici jurnalistlər üçün keçirdiyi mətbuat konfransını şərh edərkən bildirib.

“Əvvəla, Prezident azad olunmuş torpaqlarda geniş iqtisadi bərpa işləri proqramına başlandığından danışdı. Azərbaycan torpaqlarını hərtərəfli bərpa edən xilaskar ölkə olduğunu göstərmək istəyir. Bununla yanaşı, yeni Azərbaycan ətrafında diplomatik tellərini səriştəli qurmağa çalışan Prezident Əliyev İran, Türkiyə, Rusiya ilə dost olduqlarına işarə vurub. Bu ölkələrə həm şifahi, həm də iqtisadi güzəştlər verilir.

Prezidentin dediyi kimi, Azərbaycan ərazi bütövlüyünün bərpasında həmin ölkələrin töhfəsini dəyərləndirir. Həmçinin münaqişədən sonrakı dövrdə informasiya işlərinə də xüsusi diqqət yetirilir”, — deyən rusiyalı ekspert ermənilərə qarşı hər hansı iddiaların olmaması, Qarabağda yaşaya biləcəkləri barədə Prezident İlham Əliyevin dediklərinin həyata keçiriləcəyinə ümidvar olduğunu da bildirib.

“İşlərin daha bir istiqaməti kimi Prezident Əliyev münaqişənin sülhməramlılar vasitəsilə həll etməyin sonrakı dövrdə ən əlverişli çözüm variantı olduğunu Azərbaycan xalqına izah etməyə çalışıb. Çünki bu problemin həlli üçün həm Ermənistan, həm də Azərbaycan tərəfindəki radikalların təhlükə yaratdıqlarını hamımız başa düşürük. Sülhməramlılar olmasa, humanitar fəlakət baş verərdi”, — deyə ekspert qeyd edib.

Onun sözlərinə görə, ölkə Prezidenti də mətbuat konfransında bir sıra mühüm məsələlərə dair mövqelərini çatdırmaq üçün incə üsullardan istifadə edib:

“Ermənistan məğlub tərəf olduğu üçün bu ölkənin taleyi daha çox xarici ictimaiyyəti narahat edir. Əliyev də erməni əhalisinə qarşı hər hansı iddialarının olmadığını deyib. Bu mətbuat konfransının məqsədi xarici mediada anti-Azərbaycan meyllərini zərərsizləşdirməkdir. Hərtərəfli hazırlanmış, düzgün qurulmuş bu tədbir zamanı hətta Azərbaycan rəhbərliyinə o qədər də xoş olmayan suallar belə səsləndirildi”.

Azərbaycanlılarla ermənilər arasında tezliklə barışıq olacağını təsəvvür etməyin çətin olduğunu qeyd edən ekspert Əliyevin daha yaxşı gələcək qurmağa çalışan siyasətçi olduğunu bildirib:

“Ermənilərlə azərbaycanlıların birgə yaşaması nə qədər xam xəyal olsa da, bunun nəcib və hamı üçün sərfəli məram olduğu unudulmamalıdır. Yaxşı ki, Prezident İlham Əliyev bu hədəfi açıqladı”.

“Əminəm ki, Ermənistandakı müxalifət qruplarının heç biri Qarabağdakı mövcud vəziyyəti ciddi cəhdlə dəyişdirmək niyyətinə düşəcək qədər xam və dayaz düşüncəli deyil”, — o deyib.