AVMVİB sədri xalqımızı Ramazan bayramı münasibəti ilə təbrik edib
Azərbaycan Vətən Müharibəsi Veteranları İctimai Birliyinin (AVMVİB) sədri Füzuli Rzaquliyev xalqımızı mübarək Ramazan bayramı münasibətilə təbrik edib. O, Ramazan bayramının müsəlman dünyası üçün böyük mənəvi dəyərə malik olduğunu vurğulayaraq, bu müqəddəs bayramın birlik, həmrəylik və xeyirxahlıq rəmzi olduğunu qeyd edib.
Füzuli Rzaquliyev təbrikində bildirib ki, Azərbaycan xalqı hər zaman milli dəyərlərinə sadiq olmuş, tarixi vətənpərvərlik ənənələrini qoruyub saxlamışdır. Xüsusilə Vətən müharibəsi dövründə xalqımızın göstərdiyi həmrəylik və igidlik, Ali Baş Komandan, Prezident İlham Əliyevin uzaqgörən siyasəti və müdrik rəhbərliyi sayəsində qazanılan tarixi Qələbə bir daha sübut etdi ki, Azərbaycan xalqı həm döyüş meydanında, həm də siyasi arenada öz haqqını qorumağa qadirdir.
O qeyd edib ki, bu gün ölkəmiz postmüharibə dövründə yeni bir inkişaf mərhələsinə qədəm qoyub. Azad edilmiş torpaqlarda genişmiqyaslı quruculuq və bərpa işləri aparılır, Qarabağ və Şərqi Zəngəzur dirçəlir. Azərbaycan Prezidenti İlham Əliyevin qətiyyətli siyasəti nəticəsində regionda davamlı sülh və təhlükəsizlik təmin edilir, ölkəmizin beynəlxalq nüfuzu daha da güclənir.
Sonda Füzuli Rzaquliyev bir daha xalqımızı Ramazan bayramı münasibətilə təbrik edərək, əmin-amanlıq və xeyir-bərəkət arzulayıb: «İslamın nurlu günəşi qəlbinizə işıq saçsın, ruhunuzu paklıq və mənəvi rahatlıqla doldursun. Eviniz həmişə cənnət kimi abad, ailəniz firavan və xoşbəxt olsun. Hər gününüz sevgi, xeyirxahlıq və mərhəmətlə dolsun, qəlbiniz saf niyyətlər, xeyirxah arzularla döyünsün!».
AVMVİB-in Mətbuat xidməti
