Diskotekaya da hərbi formada gedirlər — Qazilər özlərini necə aparmalıdır?

“İçimizdə bəziləri var ki, hərbi formaya layiq olmayan hərəkətlər edirlər. Geyim qaydalarını pozurlar və cəmiyyətin içində də biz qazilərə qarşı səhv fikirlər formalaşdırmırlar”.

Bu sözləri Bakupost.az -a qazi baş leytenant Pərvin Abdullayev “qazi necə olmalıdır?” sualına aydınlıq gətirərkən deyib.

“Əgər sənin hərbi formanı geyinmək hüququn yoxdursa, ondan istifadə edə bilməzsən. Qazi sözünün açıqlaması “şəhidin şahidi” deməkdir. Əgər biz qazilərin bir yeri ağrıyırsa həkimə gedirik və ya Yaşat Fondu vasitəsilə xarici ölkədə sağlamlığımızı bərpa etmək üçün müalicələr edirik. Yəni, bizim ağrımız müalicə ilə sağalır, lakin şəhid anasının qəlbindəki bala ağrısı onunla bir ömür yaşayır. Ona görə də çalışmalıyıq ki, qazi adını daim qoruyaq, o ada hörmət qoyulmasına çalışaq. Qazi bir az müasir formada səslənir, əslində, biz müharibə əlilləriyik. Yəni, döyüş tapşırığını yerinə yetirərkən düşmən tərəfindən yaralanmışıq. Özümüzü elə aparmalıyıq ki, bizdən sonra gələnlər o adı daim üstün tutsunlar. Təəssüflər olsun ki, bu gün real qazilərə belə inamsızlıq yaranmağa başlayıb”.

Qazi baş leytenant bildirib ki, hər yerə hərbi formada getmək olmaz:

“Bəziləri var, diskotekaya da formada gedir. Buna yol vermək olmaz. Çünki biz o hərbi geyimin içində 3000 şəhid vermişik. Hərbi formanın geyim saatı var. Əgər sən döyüş tapşırığını yerinə yetirən briqadada xidmət edirsənsə, o forma sənin əynində qala bilər, yox əgər sən döyüş tapşırığını yerinə yetirməyən əlahiddə briqadanın hərbi qulluqçususansa, iş saatı bitdikdən sonra hərbi formanı çıxartmalı və mülki geyimini geyinməlisən. Bugünkü gündə bu qələbənin 100-də 99 faizini Xüsusi Təyinatlılara borcluyuq. Amma biz heç yerdə Xüsusi Təyinatlıların formada harasa getdiyini görməmişik.

Çünki general leytenant Hikmət Mirzəyev qanun qoyub ki, iş saatından sonra sən mülki geyimini geyinməlisən. Formanı geyinib millətə mən qaziyəm bildirməklə deyil qazi olmaq. Qoy millət, cəmiyyət özü sənə qazi olaraq hörmət qoysun. Bu gün xalqımdan çox razıyam, həqiqətən biz qazilərə çox dəyər verirlər. Heç vaxt xalqımdan, millətimdən, dövlətimdən narazılığım olmayıb. Allah xalqımızı var etsin. Şəhidlərimizə Allahdan rəhmət, qazilərimizə də can sağlığı arzulayıram”.

F. Söhrabqızı

Baku Post