Qurban edilmiş Azadlığın nemətləri…

Xaqani Ədəboğlu

Bura Azərbaycandır. Dünyanın analoqsuz bütün işləri bu ölkədə baş verir. Məsələn, Bakıda kənd yumurtası, kənddə isə Bakı (Broyler də olar) yumurtası “bərk” gedir. Bu ölkədə bir toyuq belə icazəsiz yumurta verməz, amma yumurta tərs gələndə hər kəs öz xəbərsizliyini elan edər. Biz də deyərik ki, “Allah erməninin evini yıxsın”. Səbbimiz alınar.

Erməni demişkən, yadıma Paşinyan Şuşada “Yallı” gedib, Laçında şərab içməsi düşər, bizim batmış bir Lazımımız var, ayın-oyun alıb onun gəlməsini gözləyərik. Ha Lazım gələsi, əsləhəsini götürəsi, gedib Qarabağı alasıydı. Yazıq köçkünümüz bilmir ki, mətbəxinə qoyulası, amma qoyulmayan mətbəx mebelinin davasını çəksin, yoxsa Yurdunun davasını eləsin. Gözlərini döyməkdən ləlöyün olub. Gedib Qarabağın xarabalığında “kuxna” tikəsi deyil ki?

Bizə Vətən əvəzinə iki-üç otaqlı mənzil verin yetər! 40 il də gözləsək, yataqxana-yataqxana çürüsək də Musa peyğəmbər gələsi deyil. Çünki bir yəhudi aforizmində deyilir ki, Musa yəhudiləri 40 il gəzdirəndən sonra Yaxın Şərqdə neft olmayan vəd olunmuş torpaqları tapdı. Bizim ölkədə isə neft çıxır. Neftimiz olmasaydı həzrəti Musa olmasa da, heç olmasa bir həzrəti Lazım ortaya çıxarardıq. O da qismət deyilmiş.

Amma baxanda neft də bir bəhanədi. Norveçdə də neft çıxır, hələ Qatar deyilən cırtdan bir dövlətdə də. Deyək ki, Norveç Avropadadır. Bu Qatar adlanan dövlətdə 35 ildi ki, neft tapılıb. Bu 35 ildə bir bədəvi ərəb öz xalqını və ölkəsini dünyanın ən varlı ölkəsinə çevirib. Bizdə isə neft deyə, 216 ildi ki, bu məmləkətin ciyərini çıxarırıq. Üstəlik, qızıl, mis, dəmir, civə, Mendeleyevin bütün qeyri kimyəvi elementləri çıxarmaqdayıq, amma özümüzə bir bədəvi lider tapıb ortaya çıxara bilməmişik ki, biz də adam oğlu adam kimi yaşaya bilək.

Əsrin əvvəllərində lampaya tökməyə kerosin, bu gün də maşına tökməyə benzindən korluq çəkirik. Ötən əsrdə Bakı nefti hesabına erməni Montaşovun Gürcüstanda tikdirdiyi kilsələrə, bu gün pulsuz qaz da veririk. Biz heç dəyişmədik ki? Ağıllı pullar, heç zaman bizdə ağıllı adamlara yoldaş olmadı. Bəlkə də axtarıb tapmadı. Çünki biz beləyik, vəssalam.

Amma hərdən bəlalarımızı düşünəndə bir dostumun haqlı olaraq erməni əsilli məmurların xalqa düşmən kimi münasibət bəsləməsi barədə dediklərini düşünürəm. Biz niyə öz yarım ermənilərimizi, bu tam ermənilərin qarşısına çıxarıb bir yoxlamırıq?

Qoy bizim ermənilər, onların erməniləriylə bir döşləşsinlər. Yeyib- içib şenlənirlər. Hesabatı da Ara Abramyana verirlər. Yəni bunların atalarının bu adamların üzərində, heçmi zəhmətləri olmayıb? Bu heç. Bəs bu varından barındıqları ölkəni dayıya satmaqla nə əldə edəcəklərini heç düşünüblərmi? Yəni bizim ermənilər gedib bizim olmayan ermənilərə uduzsalar, hərbi doktorinamıza yenidən baxmalı olacağıq.

Saklar Azərbaycandan 28 il sonra öz ölkələrinə qayıdanda “kor oğulları” onları öz məmləkətlərinə buraxmadılar. Günlərlə dirənişdən sonra sak türklərinin ağsaqqalı, bu qullardan törəyənlərə qılınc göstərməyin yanlış olduğunu və onlara qamçı göstərməyin vacib olduğunu məsləhət bilir. Sak ordusu ağsaqqalın dediyi kimi dirəniş göstərən tərəfə qamçı göstərərək gedirlər və o döyüşən qullar ağalarının gəldiyini anlayıb təzim edirlər. Biz də azğın kişilərimizdən döllənmiş “Haykanuşun biclərinə” qamçı göstərməyimizin zamanıdır. Laçının, Şuşanın işğalı 28-ci yaşına qədəm qoyur…

Dərdli deyingən olar. Bu məmləkətin dərdi özündən ağırdır. Qurban edilmiş Azadlığın Nemətləri ortaya bir Azərbaycan Xaos Hərəkatı atıb. Güya Xaos Cəbhəsindən bay olmuşduq, qalmışdı qalanı. Özbəkistanın milli azadlıq hərəkatının və Tacikistan Qurtuluş hərəkatının liderləri yenə denominasiyaya uğramış əski əskinaslar kimi özlərini siyasi “tədavülə” soxuşdurmaq istəyirlər. Bu zavallılar anlamırlar ki, belə “pullar” Sahil bağında kolleksiya yığanların yanında urvatlı ola bilərlər. Hələ bir Azadlığın nakam neməti düşünür ki, yenə milyonlar onun əlinin işarəsiylə oturub durmaq idmanı edəcək. Binəva bu illər ərzində anlamayıb ki, milyonu meydana yığanlar elə bu gün də o milyonları o meydana yığa bilərlər. İnternet boyu didişən bu adamların DE-BAT adıyla batdıqları acınacaqlı durumları görəndə düşünürəm ki, bunları eyni qəbristanlıqda basdırsalar, qəbristanlıq “ayaq açıb” sürüşər. Bu, SSRİ dağıdanlar, bu gün nəyi dağıtmaq istəyirlər? Yoxsa, Qarabağımı alacaqlar?

Əlbəttə yox! Bizə Qarabağ lazımdırmı? Görürsən ki, yenə də Lazım. Hara çevirsək ortaya bir Lazım çıxar. Mamedyarov neyləsin xaricdə yarım saata erməni jurnalisti başa salır, amma Azərbaycanda 15 ildi jurnalist cəhənnəmə, heç bir köçkünü də başa sala bilməyib. Ona görə də erməni Zöhrab Mnasakanyanı görəndə çiçəyi çırtlayır. Çünki bizim xarici işlər nazirini, deyəsən təkcə ermənilər yaxşı başa düşürlər.

Bir də görürsən köçkünlü, qaçqınlı, elli-obalı millət bir birinə dəyir ki, “Makedon dava edəcək”, yəni görüşəcəklər. Guya 25 ildi ki, tərəflər özgə işlə məşğul olurlarmış? Sonuncu dəfə bir qonşum bağrı yarıla-yarıla soruşdu ki, bəs Zöhrabla Elmar görüşəcəklər. Görəsən nəticə olacaqmı? Dedim ki, qonşu, narahat olma, onlar görüşmürlər ki, problemi həll etsinlər. Görüşürlər ki, növbəti görüşün vaxtını və yerini dəqiqləşdirsinlər. Bu imitasiyalar üç bacılara da, ermənilərə də sərf eləyir, Bizimkilər barədə heç nə deyə bilmərəm. Dövlət sirridir.

Yaxşı yadıma düşdü. Deyirlər ki, Yazıçılar Birliyi daha yazmağı tərgidib striptizlə məşğul olmağa başlayıb. Çox alqışlanası qərardır. Faiqin reytinqi Anarın reytinqindən üstün olma səbəbi elə striptizdi. Çox zamanında alınmış qərardır. Onsuz da bu millət 10 ildi oxumağı tərgidib…

Dostum Orxan demişkən “obedə” çıxıb gəlirəm…

18 may 2019