34 i̇ldən sonra doğma torpağa qovuşan şəhi̇d
Birinci Qarabağ müharibəsinin qanlı və keşməkeşli günlərində Vətən torpağı uğrunda döyüşərək itkin düşən, uzun illər sonra isə şəxsiyyəti müəyyənləşdirilən şəhid Məhərrəmov Vaqif Mənsim oğlu 34 ildən sonra doğulduğu Neftçala torpağının qoynuna tapşırıldı. İnsan bəzən bu dünyadan köçür, lakin adı zamanın yaddaşından silinmir. Vaqif Məhərrəmov da illərlə ailəsinin, doğmalarının və onu tanıyanların qəlbində yolunu gözləyən bir Vətən oğlu kimi yaşadı. İllər keçdi, zaman dəyişdi, lakin bir ananın gözləyən qəlbi, bir ailənin bitməyən ümidi və Vətənin şəhidlərinə olan borcu dəyişmədi. Nəhayət, tale onu yenidən doğma torpağına gətirdi. 21 avqust 2026-cı il tarixində Neftçala Rayon İcra Hakimiyyətinin təşkilatçılığı ilə şəhid Vaqif Mənsim oğlunun ailəsinin yaşadığı Neftçala şəhərində izdihamlı dəfn mərasimi keçirildi.
Vida mərasimində AVMVİB-nin Neftçala rayon şöbəsinin sədr müavini, psixoloq Rahim müəllim və Banka özəyinin sədri Arif Mehi oğlu, Neftçala Rayon İcra Hakimiyyətinin nümayəndələri, şəhidin ailə üzvləri, hüquq-mühafizə orqanlarının rəhbərləri, Müdafiə Nazirliyinin əməkdaşları, rayon ictimaiyyətinin nümayəndələri, şəhidin döyüş yoldaşları, şəhid ailələri, qazilər, rayon sakinləri və media nümayəndələri iştirak etdilər. Mərasim bir daha göstərdi ki, şəhid ölmür. Torpağa bədən tapşırılsa da, ruh əbədiyyətə qovuşur, Vətən uğrunda verilən can isə millətin yaddaşında daim yaşayır. İllərlə itkin düşən şəhidin Vətənə qayıdışı yalnız bir ailənin həsrətinin sona çatması deyildi; bu, həm də xalqın öz şəhidinə, öz qəhrəmanına sahib çıxmasının müqəddəs təcəssümü idi. Dəfn mərasimi zamanı şəhidin əziz xatirəsi dərin ehtiramla yad edildi, hərbi ənənəyə uyğun olaraq yaylım atəşi açıldı, orkestrin ifasında Azərbaycan Respublikasının Dövlət Himni səsləndirildi. Şəhidin ruhuna dualar oxundu, məzarı üzərinə güllər düzülərək əklillər qoyuldu. Şəhidin tabutuna bükülmüş Azərbaycan Respublikasının üçrəngli Dövlət Bayrağı hərbi ehtiram və müqəddəs ənənəyə uyğun olaraq onun ailə üzvlərinə təqdim edildi. O bayraq sadəcə bir parça deyildi — o, uğrunda can verilmiş Vətənin, namusun, azadlığın və əbədiyyətə qovuşmuş bir şəhidin ailəsinə buraxdığı müqəddəs əmanət idi. Qeyd edək ki, Vaqif Məhərrəmov 1971-ci ildə Neftçala rayonunda anadan olmuş, 5 sentyabr 1992-ci ildə Ağdərə rayonunun Çıldıran kəndi uğrunda gedən döyüşlər zamanı itkin düşmüşdür. Uzun illərdən sonra şəxsiyyəti müəyyənləşdirilən şəhid, nəhayət, doğulduğu Neftçala torpağında torpağa tapşırıldı.
Haqq yolunda verilən can yoxluğa getməz; o can əbədiyyətin qapısından keçib millətin yaddaşında yenidən doğular. Vaqif Məhərrəmovun Vətənə dönüşü də illərin ayıra bilmədiyi ruhla torpağın yenidən qovuşması idi. Şəhidlər bizim sönməyən çırağımız, Vətənimizin əbədi yaddaşı, azadlığımızın haqqı və gələcək nəsillərə buraxdığı müqəddəs əmanətdir. Allah bütün şəhidlərimizə rəhmət eləsin! Onların pak ruhları qarşısında baş əyir, şəhid ailələrinə və doğmalarına səbir diləyirik. Şəhid Vaqif Mənsim oğlu Məhərrəmovun əziz xatirəsi daim qəlblərdə yaşayacaq, adı isə Neftçala torpağının yaddaşında əbədi qalacaq. ŞƏHİDLƏR ÖLMƏZ, VƏTƏN BÖLÜNMƏZ!
Mübariz Eldar oğlu
AVMVİB-nin Neftçala rayon şöbəsinin sədri
