Mingəçevir şəhərində 31 Mart – Azərbaycanlıların Soyqırımı Günü ilə əlaqədar anım tədbiri keçirilmişdir

Bu gün Mingəçevir şəhərində 31 Mart – Azərbaycanlıların Soyqırımı Günü ilə əlaqədar anım tədbiri keçirilmişdir. Tədbir çərçivəsində xalqımıza qarşı törədilmiş qanlı qırğınların qurbanlarının xatirəsi dərin ehtiramla yad olunmuş, bu faciənin tarixi mahiyyəti və milli yaddaşımızdakı yeri bir daha vurğulanmışdır. Çıxışlarda qeyd olunmuşdur ki, 1918-ci ilin mart hadisələri zamanı azərbaycanlılara qarşı həyata keçirilən kütləvi qırğınlar xalqımızın tarixində silinməz iz qoymuş ağır cinayətlərdən biridir və bu həqiqətlərin gələcək nəsillərə çatdırılması hər birimizin mənəvi borcudur.

Anım tədbirində Azərbaycan Vətən Müharibəsi Veteranları İctimai Birliyinin nümayəndələri və təşkilat üzvləri də iştirak etmişlər. Təşkilatın üzvləri soyqırımı qurbanlarının əziz xatirəsini ehtiramla anmış, xalqımıza qarşı törədilmiş bu faciələrin heç zaman unudulmamalı olduğunu bildirmişlər. Vurğulanmışdır ki, tarixi yaddaşın qorunması, gənc nəslin milli ruhda tərbiyə olunması və həqiqətlərimizin daim yaşadılması bu gün də xüsusi əhəmiyyət daşıyır. Tədbir iştirakçıları 31 Mart şəhidlərinin ruhuna dualar oxumuş, xalqımızın bir daha belə faciələrlə üzləşməməsi üçün milli birliyin və həmrəyliyin vacibliyini qeyd etmişlər.