Arif Mehi oğlu şəhid anma mərasimində
Bu gün Neftçala rayonunun Bankə qəsəbəsi müqəddəs bir xatirənin nuruna qərq olmuşdu. Qarabağ şəhidi Fətullayev Rafail Rüfət oğlunun Cənnət Mövludu münasibətilə keçirilən anım mərasimi təkcə bir doğum gününün deyil, əbədiyyətə ucalan bir ruhun təntənəsi idi. 22 mart 2003-cü ildə dünyaya göz açan Rafail, qısa ömrünü uzun bir mənaya çevirənlərdən oldu – o, Vətənin çağırışını sadəcə bir əmr deyil, bir iman, bir ilahi əhd kimi qəbul etdi. Onun həyatı, Qurani-Kərimin “Allah yolunda öldürülənləri ölü zənn etməyin” hikmətinin canlı təcəssümü idi. 19 illik ömründə o, torpağı sadəcə sevmədi – onu varlığının mahiyyətinə çevirdi. 14 sentyabr 2022-ci ildə Kəlbəcərin Alagöllər yüksəkliyində, “KA-6” mövqeyində düşmən artilleriyasının alovları altında geri çəkilməyərək, imanla yoğrulmuş iradəsini nümayiş etdirdi. Cismini yandıran mərmi onun ruhunu sındıra bilmədi – əksinə, o ruhu ucaldaraq şəhidlik zirvəsinə yüksəltdi.
Bu gün Neftçala qəbristanlığında uyuyan Rafail torpağın altına deyil, millətin yaddaşına həkk olunub. Onun həyatı bir fəlsəfədir: igidlik illərlə deyil, qəlbin Allaha bağlılığı, Vətənə sədaqəti ilə ölçülür. Şəhidlik isə ölüm deyil – əbədiyyətə açılan ilahi qapıdır. Cənnət Mövludu münasibətilə AVMVİB-nin Neftçala rayon Bankə qəsəbə özəyi, şəhid ailələri və qəsəbə sakinləri bir araya toplaşaraq bu uca ruhu yad etdilər. Şəhidin həyətində qurulan mərasimdə dini xadim Kərbəlayi Əliməmməd şəhidliyin İslamda ən uca məqam olduğunu izah etdi, Hz. Əlinin (ə) “Vətəni sevmək imandandır” kəlamı ilə bu sevginin ilahi mahiyyətini qəlblərə həkk etdi. Hər bir çıxış edən şəhidliyin mənəvi zirvəsindən söz açdı, ailəsinə səbir dilədi və birlikdə şəhidlərin məzarları ziyarət olunaraq dualar oxundu. Sonda çəkilən xatirə şəkilləri sadəcə bir anın deyil, bir millətin yaddaşının şahidi oldu. Biz – Azərbaycan Vətən Müharibəsi Veteranları İctimai Birliyinin sədri Füzuli Rzaquliyev başda olmaqla, 93 min müharibə veteranı, AVMVİB Neftçala rayon şöbəsinin üzvləri və “Qocalar Döyüşə Gedir” qrupunun nümayəndələri olaraq – bütün şəhidlərimizə Uca Allahdan rəhmət diləyir, bu müqəddəs itkini “Başın sağ olsun, Vətən!” kəlamı ilə qarşılayaraq şəhid ailələrinə səbir, iradə və qürur arzulayırıq.
Çünki şəhidlər ölmür – onlar haqqın nurunda yaşayan əbədi dastanlardır…
Mübariz Eldar oğlu AVMVİB-nin Neftçala rayon şöbə sədri
