Binəqədidə şəhid zabitimizin adına küçənin açılışı oldu

Bakının Binəqədi rayonunda antiterror şəhidi polkovnik-leytenant Əkrəm Şadmanovun adına küçənin açılışı olub.

Ə.Şadmanov 2020-ci ildəki İkinci Qarabağ müharibəsi və 2023-cü ildəki antiterror tədbirləri zamanı xüsusi şücaət göstərib. O, 2023- cü il sentyabrın 24-də Ağdam rayonunda döyüş mövqelərinə baş çəkməyə gedərkən minaya düşərək şəhid olub. O, «Vətənə xidmətə görə» ordeni, «Vətən uğrunda», «İgidliyə görə» və bir neçə rayonun azad olunması uğrunda medalları ilə təltif olunub. Şəhid polkovnik-leytenant 2023-cü il sentyabrın 24-də ikinci fəxri xiyabanda dəfn edilib.

Tədbirdə Binəqədi Rayon İcra Hakimiyyətinin nümayəndələri, Azərbaycan Vətən Müharibəsi Veteranları İctimai Birliyinin (AVMVİB) Binəqədi rayon şöbəsinin sədri və üzvləri, o cümlədən şəhidin ailə üzvləri iştirak ediblər.

Açılış mərasimi zamanı şəhidin döyüş yolu və göstərdiyi şücaətdən danışılıb. Xatırladaq ki, şəhidin adı küçəyə Bakı Şəhər İcra Hakimiyyətinin müvafiq sərəncamı ilə verilib.

AVMVİB Mətbuat xidməti
AVMVİB Binəqədi rayon şöbəsinin sədri Mərdan Ələsgərov