AVMVİB sədri Qarabağla bağlı açıqlamalar verdi

Sentyabrın 15-də Xankəndində qondarma separatçı rejimin Təhlükəsizlik şurasının ilk iclası keçirilib və rejimin quldurbaşı Araik Arutyunyan iclasda çıxış edərək, hərbi, siyasi, iqtisadi və informasiya təhlükəsizliyini xüsusi vurğulayan Arutyunyan da faktiki Azərbaycana qarşı 7 şərt-prinsip ortaya qoyub.

Bu quldurbaşı o qədər qudurub ki, Azərbaycanı “təcavüzkar” adlandıraraq, öz adlarını da bizə verib.“Dəqiq zəmanətlər sayəsində, münaqişənin həlli prosesində güc tətbiq etmə və təhdid etmə cəhdlərini istisna etmək lazımdır. Əks təqdirdə, Artsax Respublikası “təcavüzkar Azərbaycana” qarşı bərabər nisbətdə olmayan əks zərbə vurmağa, eyni zamanda hərbi əməliyyatları onun ərazisinə köçürməyə hazırdır”.

Düşmənin mövqeyi tam aydın və birmənalıdır və artıq neçənci dəfədir ki, istər Ermənistan rəhbərliyi, istərsə də Qarabağdakı separatçılar bunu üzümüzə deyirlər. Bu prinsipləri irəli sürən bir separatçı tör-töküntüsü ilə hansı sülh danışıqları aparıla bilər?

Azərbaycan Vətən Müharibəsi Veteranları İctimai Birliyinin sədri Füzuli Rzaquliyev Araik Arutyunyanın bu sərsəmləmələrindən hiddətləndiklərini bildirdi.

AVMVİB sədri Füzuli Rzaquliyev dedi: “Son günlər Ermənistan KİV-ləri və Xüsusi Xidmət orqanları, Rusiya, həmçinin içimizdəki erməni kolonunda bir hərəkətlilik hiss olunmaqdadır. Bütün güclərini ölkəmizdə destablizasiya yaratmağa, separatçılıq ocaqları qalamağa, ölkəni xaosa sürükləmək üçün ən xırda vasitələrdən istifadə etməyə çalışmaları göz önündədir. Düşmənin Tovuzda və Qarabağdakı təhrikedici hərəkətlərə yol verməsi və Azərbaycan tərəfinin susqun dayanması əhali arasında narazılıqla qarşılanmaqdadır.

Uzandıqca uzanan Qarabağ problemi, Kazimirovun “həlli olmayan problem” fikrini təsdiqləməkdədir. Bir çoxları, o cümlədən Qarabağ məsələsini öz şərəf məsələsi hesab edən döyüşçülər məsələyə münasibət bildirməmizi xahiş edirlər.”

AVMVİB sədri Füzuli Rzaquliyev sayta verdiyi açıqlamada dedi: “Birincisi, dəfələrlə demişəm, düşmən yaxşı bilir ki, son Qarabağ savaşçısı yaşadıqca onlar 5 imperiyanın sayəsində de-fakto yiyələndikləri əbədi və əzəli Azərbaycan torpaqları olan Qarabağa de-yure sahib durmaları mümkün olmayacaq.

Azərbaycanda bunca şərəfsiz bir addımı atan adamın olması və olacağı dövrlər ötüb. Düşmənin əl-ayağa düşməsi, saxta “demokratiya tamaşası” oynayıb güya demokratik cəmiyyət qurmaları kimi absurd oyunları da Qarabağın ilhaqına hesablanıb. Çünki bu dəyərlərə sahib beynəlxalq ictimaiyyət erməni “fırıldaq demokratiyasını” bu dəfə tez deşifrə edib və gülüş hədəfinə çevirib. Yəni demokratın və ya faşistin separatçı, terrorçu, anneksiyaçı olmasının elə bir fərqi yoxdur.

ATƏT-in Minsk Qrupunun və Avropa Birliyinin son bəyanatları Ali Baş Komandanımız cənab İlham Əliyevin yürütdüyü ardıcıl siyasətin bəhrələridir. Bunu şərh etməli və vətəndaşlarımıza izah edilməlidir. Prezident İlham Əliyevin Qarabağ məsələsində dəyişməz və stabil mövqeyə malik olması hər bir döyüşçünün ürəyincədir və erməni cəmiyyətinin tam əksinə olaraq inamla deyə bilərəm ki, veteranlar ordusu öz Komandanlarının əmrini gözləyən bir ordudur. Yaşımıza baxmayaraq biz bu döyüşün hər an olacağını və orada öndə olacağımızı arzulayırıq. Bunu dəfələrlə bəyan etmişik. Yəni güclü ordumuzun gücünə əlavə güc qatmağa, Ali Baş Komandana hər cür dəstək verməyə hazırıq.

Xüsusən də son Türkiyə-Azərbaycan birgə təlimləri xalqımız tərəfindən ruh yüksəkliyi ilə qarşılanıb. Qardaş Türkiyənin regionda görünməsi yeni bir dövrün başlandığını bəyan etdi. 102 il öncə olduğu kimi biz yenidən birgəyik. Qafqaza bədbəxtliklər gətirmiş Rusiya gec-tez Qafqazdan başını götürüb qaçmağa şükür edəcəyi günlərə az qalıb. Bu birliyin əlehinə çıxan rus və fars əlaltıları, 5-ci kolon mənsubları öz iyrənc və xain xislətlərinə uyğun təbliğatlarını genişləndirməyə çalışmaqdadırlar. Hər bir vətənsevər bu işdə diqqətli olmalıdır. Hər birimiz “təki Vətən yaşasın və Qarabağımız azad olsun” notları üzərində köklənməlidir…

Prezidentin Qarabağla bağlı bu cür sərt mövqeyi düşməni daim qorxu altında saxlayır. Bu gün içimizdəki erməni təbliğatçı ruporları Artyunyan və Paşinyanın siyasi çərçivəyə sığmayan boşboğazlıqlarını bayraq edib qəhrəmanlıq kimi təqdim etməyə çalışırlar. Xüsusən də öncə Paşinyan Xankəndində: “Mən Madrid prinsipləriylə razıyam, ancaq beynəlxalq qurumlar bu prinsipləri mənə konkret şəkildə izah etməlidirlər”-dediyi fikirləri bu gün Araik adlı quldurbaşı belə təkrarlayır: “Artsax xalqının öz müqəddəratını təyinetmə hüququndan istifadə etməsi prioritet olaraq tanınmadan, münaqişənin həlli üçün hər hansı bir seçim, münaqişə tərəfləri arasında məzmunlu bir müzakirə predmetinə çevrilə bilməz”.

Bu cür sərsəm bəyanatlar ermənilərin əlavə vaxt qazanmaq hiyləsindən başqa bir şey deyil. Madrid prinsiplərinə əsasən Dağlıq Qarabağdan savayı bütün ətraf rayonlardan erməni qoşunları çıxmalıdır. Sonra sərhədlər açılmalı və referendum keçirilməlidir. Burdan belə başa düşülür ki, Paşinyan işğal edilmiş ətraf rayonların Azərbaycana qaytarılmasına razıdır. Bəs nə üçün o, bir müddət əvvəl sülhü torpağa dəyişməyəcəyik deyirdi? Ortada erməni həyasızlığı var və bu həyasızlığı ortadan qaldırmaq üçün tək yol onlara öz başa düşdükləri bir dildə cavab verilməsidir.

Deməli, düşmən küncə sıxışdırıldığını yaxşı bilir və biz bu gün daha sıx birləşməli və düşmənə qarşı düşmən kimi mübarizə aparmalıyıq.”