Şəhadətin əbədi məşəli və mənəvi zəfər: «Salam Olsun Şəhidlərə – 3»
“Həqiqətən, haqq yolunda canından keçən müqəddəs ruhlar ölməzliyə qovuşan nur çeşmələridir. Qurani-Kərimin ali hikməti ilə bəyan olunduğu kimi: ‘Allah yolunda öldürülənlərə ölü deməyin; əksinə, onlar Rəbbi dərgahında diridirlər…’ (Bəqərə, 154). Şəhidlik – cismin fənalığından ruhun bəqasına, fanidən əbədiyyətə ucalan ən ali irfani məqamdır.” Tarixin və yaddaşın vicdan borcu olan şəhidlərimizin müqəddəs xatirəsini əbədi yaşatmaq, onların əziz ruhlarına ehtiram bildirmək hər bir mənəvi risalə daşıyan insanın ali borcudur. Bu müqəddəs amalla, Azərbaycan Vətən Müharibəsi Veteranları İctimai Birliyinin (AVMVİB) Neftçala rayon şöbəsi hər il olduğu kimi, bu il də mənəviyyat və iradənin vəhdətini təcəssüm etdirən silsiləvi idman yarışlarına ev sahibliyi etdi. Cismin tərbiyəsini ruhun ucalığı ilə birləşdirən, vətənpərvərlik alovunu gəncliyin qəlbində tutuşduran “Salam Olsun Şəhidlərə – 3” adlı voleybol turnirinə 11 avqust 2026-cı il tarixində Neftçala rayonunun Bankə qəsəbəsində yerləşən Səməd Vurğun adına 2 saylı tam orta məktəbin voleybol meydançasında rəsmi start verildi.
Yarış yalnız bir idman mücadiləsi deyil, eyni zamanda birliyimizin, milli həmrəyliyimizin və mənəvi birliyimizin əyani təzahürü idi. Olimpiya sistemi üzrə təşkil olunan turnirdə 3 qrupda cəmləşən 12 komanda (4/4/4 sıralaması ilə) əsl mərdlik, intizam və sağlam rəqabət nümayiş etdirdi. Hər bir qarşılaşma şəhidlərimizin əziz xatirəsinə bəslənən dərin ehtiramın və gənclərimizin mənəvi birliyinin təcəssümünə çevrildi. Nəhayət, 4 sentyabr 2026-cı il tarixində gərgin və möhtəşəm final qarşılaşması ilə turnir öz məntiqi və mənəvi yekununa çatdı. Həlledici final oyununda Bankə komandası əzmkar mübarizə nümayiş etdirərək Surra komandası üzərində 3–2 hesabı ilə parlaq qələbə qazandı və turnirin I yerinə layiq görüldü.
Lakin bu meydanda əsl qalib – şəhidlərimizin adı, vətən sevgisi və xalqımızın sarsılmaz birliyi oldu. Bu ali amala xidmət edən tədbirin yüksək səviyyədə təşkilində əməyi keçən hər kəsə dərin minnətdarlığımızı bildiririk. AVMVİB rəhbərliyi – başda təşkilatımızın sədri Füzuli Rzaquliyev olmaqla, AVMVİB-nin Neftçala rayon şöbəsinin bütün kollektivi adından: Qapılarını bu xeyirxah və mənəvi təşəbbüsə açan, gənclərin vətənpərvərlik ruhunda tərbiyə olunmasına şərait yaradan S. Vurğun adına Bankə qəsəbə 2 saylı tam orta ümumtəhsil məktəbinin direktoru Tural Abbasova; Hər zaman fədakar əməyi ilə yanımızda olan, gənclərin fiziki və mənəvi hazırlığında böyük zəhmət çəkən AVMVİB Neftçala rayon şöbəsinin idman məsələləri üzrə könüllü məşqçisi Murad Səfadət oğlu Bağırova; Yarışın təşkilati və mənəvi dayaqlarında mühüm rol oynayan şöbə sədrinin müavini, psixoloq Rahim Manafova və təşkilatımızın bütün fəal üzvlərinə dərin təşəkkürümüzü və ehtiramımızı bildiririk. Hikmət əhlilərinin bəyan etdiyi kimi: “Ruhunu ali dəyərlərə və haqq yoluna həsr edən xalqların addımları sarsılmaz, gələcəyi nuranidir.” Şəhidlərimizin müqəddəs ruhları qarşısında dərin ehtiramla baş əyir, onların əbədi xatirəsini həm qəlbimizdə, həm də əməllərimizdə yaşatmağa söz veririk.
Seyyid Mübariz Eldar oğlu AVMVİB-nin Neftçala rayon şöbəsinin sədri
