AVMVİB QHT layihəsi çərçivəsində Yevlax rayon veteranları ilə görüş keçirib
Yevlax rayonunun Bələdiyyə Binasının akt zalında Azərbaycan Vətən Müharibəsi Veteranları İctimai Birliyi tərəfindən müharibə veteranlarının hüquqi maarifləndirilməsi mövzusunda layihə həyata keçirilib. Tədbirdə Azərbaycan Vətən Müharibəsi Veteranları İctimai Birliyinin təşkilati məsələlər üzrə sədr müavini Vahid Abdurəhmanov, Yevlax Rayon İcra Hakimiyyəti Başçısı Aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Vasif İsayev, AVMVİB sədrinin müavini, Nərimanov rayon şöbəsinin sədri Qurban Osmanov, AVMVİB Yevlax rayon şöbəsinin sədri Şahin Məmmədov və Yevlax rayonundan olan Qarabağ müharibəsi veteranları iştirak ediblər.
Əvvəlcə Ümummilli Lider Heydər Əliyevin və torpaqlarımızın suverenliyi uğrunda canlarını qurban vermiş şəhidlərin xatirəsi bir dəqiqəlik sükutla yad edilib. Azərbaycan Vətən Müharibəsi Veteranları İctimai Birliyinin sədr müavini Vahid Abdurəhmanov bildirib ki, icra olunan layihə Azərbaycan Respublikasının Qeyri- Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir. O, qeyd edib ki, Dövlət tərəfindən həssas sosial qrupların problemlərinin həll olunmasına, onların hüquqlarının reallaşması üçün kompleks təbirlər görülür. Bəzi hallarda müharibə əlilləri və veteranları yaranmış müxtəlif situasiyalarda hansı hüquqi proseduraları reallaşdıracağını bilmir və eyni zamanda müxtəlif müraciət formalarının hazırlanmasında çətinlik çəkirlər. Bütün bu məsəllərdə Azərbaycan Vətən Müharibəsi Veteranları İctimai Birliyi müharibə veteranlarına dəstək olmağa hazırdır. Tədbirdə Yevlax Rayon İcra Hakimiyyəti Başçısı Aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Vasif İsayev çıxış edərək layihənin əhəmiyyətindən və rayon icra hakimiyyəti tərəfindən bu sahədə görülən işlərdən danışıb. Azərbaycan Vətən Müharibəsi Veteranları İctimai Birliyinin (AVMVİB) sədr müavini Vahid Abdurəhmanov iştirakçılara layihə haqqında məlumat verdi. Bildirildi ki, layihənin məqsədi torpaqlarımızın ərazi bütövlüyü uğrunda erməni işğalçılarına qarşı mərdliklə döyüşmüş birinci və ikinci Qarabağ döyüşlərində iştirak etmiş müharibə veteranlarının hüquqi maarifləndiriməsi, onların yerlərdə üzləşdikləri sosial problemlər və onların həlli yollarının araşdırılmasıdır. Məqsədimiz bu layihə çərçivəsində ehtiyacı olan müharibə veteranlarına hüquqi yardımlar göstərmək və onlara dəstək olmaqdır. AVMVİB sədrinin müavini Qurban Osmanov çıxışında bildirdi: “bizim üçün birinci, ikinci müharibə anlayışı yoxdur. Döyüşçü döyüşçüdür. Vətənin müdafiəsində dayanaraq öz sağlamlıqlarını itiriblər. AVMVİB-də müharibə iştirakçılarına və şəhid ailələrinə daim diqqət var. Onların müraciətlərinə dərhal cavab verilir. Qarşıya çıxan problemlərin hüquqi yolla həlli üçün təşkilatımız daim veteranlarımızın yanındadır.” AVMVİB Yevlax rayon şöbəsinin sədri Şahin Məmmədov bu şəraiti yaratdıqlarına görə Azərbaycan Respublikası Qeyri-Hökümət Taşkilatlarına Dövlət Dəstəyi Agentliyinə və Azərbaycan Vətən Müharibəsi Veteranları İctimai Birliyinə və Yevlax rayon İcra Hakimiyyəti rəhbərliyinə öz minnətdarlığını çatdırdı. Problemlərin həllində İctimai Birlik kimi hər bir veteranın yanında olacaqlarını qeyd etdi.
Daha sonra Azərbaycan Vətən Müharibəsi Veteranları İctimai Birliyinin sədr müavini Vahid Abdurəhmanov müharibə əlillərinin və veteranlarının qanunvericilikdə nəzərdə tutulan sosial hüquqları barəsində geniş məlumat verib. O çıxışında bildirdi ki,bu cür tədbirlər Müzəffər Ali Baş Komandanımız cənab İlham Əliyevin yürütdüyü sosial siyasətə dəstək xarakteri daşıyır. Daha sonra rayonda yaşayan müharibə veteranlarını maraqlandıran məsələlərə aydınlıq gətirildi. Qarşılıqlı diskussiya şəklində keçirilən tədbirdə iştirakçılara sosial siyasət və bu sahə üzrə qanunlar barədə müvafiq təlimatlar verilib və onların sualları cavablandırılıb. Sonda xatirə şəkli çəkildi.
AVMVİB Mətbuat xidməti
