Füzuli Rzaquliyev: «31 mart soyqırımı — XX əsrdə bəşəriyyətə qarşı törədilən ən ağır cinayətdir»
Füzuli Rzaquliyev,
Azərbaycan Vətən Müharibəsi Veteranları İctimai Birliyinin sədri
Tarix boyu Azərbaycan xalqı sülhsevər və multikultural dəyərlərə sadiq olmuş, müxtəlif millətlərlə dostluq və mehriban qonşuluq şəraitində yaşamışdır. Lakin təəssüf ki, xalqımız dəfələrlə düşmən qüvvələrin amansız hücumlarına və kütləvi qırğınlarına məruz qalmışdır. 1918-ci il mart ayının 30-31-də Bakı, Şamaxı, Quba, Qarabağ, Naxçıvan və Lənkəran da daxil olmaqla Azərbaycanın müxtəlif bölgələrində bolşevik-daşnak birləşmələri tərəfindən törədilən soyqırımı XX əsrin ən qanlı cinayətlərindən biridir.
31 Mart soyqırımı zamanı erməni daşnakları və bolşeviklər dinc əhaliyə qarşı xüsusi qəddarlıq nümayiş etdirmiş, minlərlə insan yalnız azərbaycanlı olduqlarına görə vəhşicəsinə qətlə yetirilmişdir. Tarixi mənbələrə əsasən, bu qanlı hadisələr zamanı təkcə Bakıda 12 mindən çox azərbaycanlı öldürülmüş, Şamaxıda 7 mindən çox insan, o cümlədən 1653 qadın və 965 uşaq qətlə yetirilmişdir. Quba bölgəsində 16 mindən çox insan soyqırımın qurbanı olmuşdur. Quba şəhərində aşkarlanan kütləvi məzarlıq erməni quldurlarının törətdikləri vəhşiliklərin açıq sübutudur.
Bu qanlı hadisələr təkcə Bakıda deyil, Azərbaycanın digər bölgələrində də baş vermişdir. Şamaxı, Quba, Qarabağ, Zəngəzur, Naxçıvan və Lənkəranda dinc əhali xüsusi qəddarlıqla məhv edilmiş, yaşayış məntəqələri yandırılmış, məscidlər və tarixi abidələr dağıdılmışdır. Məqsəd isə aydın idi – Azərbaycan xalqını qorxutmaq, torpaqlarımızda erməni dövlətinin yaradılmasına şərait yaratmaq.
Uzun illər bu dəhşətli cinayət haqqında danışmaq qadağan edilmiş, tarixi həqiqətlər gizlədilmişdir. Lakin Ümummilli Liderimiz Heydər Əliyevin 1998-ci il 26 mart tarixli fərmanı ilə 31 Mart – Azərbaycanlıların Soyqırımı Günü kimi elan edildi. Bu qərar tariximizə verilmiş mühüm qiymət olmaqla yanaşı, dünya ictimaiyyətinə bir çağırış idi – insanlığa qarşı törədilən bu dəhşətli cinayət unudulmamalıdır!
Ali Baş Komandanımız və Prezidentimiz İlham Əliyev cənablarının rəhbərliyi ilə Azərbaycan dövləti tarixi ədalətin bərpa edilməsi üçün mühüm addımlar atmaqdadır. Azərbaycan həqiqətlərinin beynəlxalq ictimaiyyətə çatdırılması istiqamətində ardıcıl fəaliyyət həyata keçirilir. Bu gün Azərbaycan alimləri, tarixçiləri və tədqiqatçıları erməni vandalizmini sübut edən çoxsaylı faktları üzə çıxarır və dünya ictimaiyyətinin diqqətinə çatdırırlar. Bu gün biz qalib xalq kimi haqq səsimizi dünyaya çatdırmalı, erməni cinayətlərinin ifşası üçün fəaliyyətimizi davam etdirməliyik. Tarixi ədalət gec-tez öz yerini tapır. Biz inanırıq ki, Azərbaycan həqiqətləri dünya ictimaiyyəti tərəfindən tam qəbul ediləcək və 31 Mart soyqırımı bəşəriyyətə qarşı törədilən ən ağır cinayətlərdən biri kimi tanınacaq.
Azərbaycan Vətən Müharibəsi Veteranları İctimai Birliyi olaraq, biz 31 Mart soyqırımı qurbanlarının xatirəsini dərin hüznlə anır, onların ruhuna dualar oxuyur və bir daha bildiririk ki, bu qanlı tarixi heç vaxt unutmayacağıq. Azərbaycan xalqı öz torpağının sahibidir və bu torpaqlarda bir daha belə faciələrin yaşanmaması üçün hər zaman ayıq-sayıq olmalıdır.
Haqq nazilər, amma üzülməz! Biz öz torpaqlarımızı azad etdik, tariximizi yazdıq! Zəngəzur dəhlizində görüşənədək!
